Man vermoor ná hy eksmeisie met mes steek
2012-01-30 14:00
Johannesburg – ‘n Man is vermoor nadat hy sy eksmeisie verskeie kere tydens ‘n rusie in Seshego gesteek het, het die polisie in Limpopo Maandag gesê.
Die 19-jarige meisie was Sondagmiddag saam met haar kêrel in Ga-makgakga toe haar 21-jarige ekskêrel haar glo genader het, het ao. Mothemane Malefo gesê.
“Hy het gevra of hy haar alleen kan sien en ‘n argument het tussen die twee ontstaan. Die 21-jarige man het ‘n mes uitgeruk en het die 19-jarige meisie in die bolyf gesteek.”
Die vrou se kêrel het haar ekskêrel glo herhaaldelik daarna met ‘n panga gekap. Hy is op die toneel dood.
Die polisie het die kêrel in hegtenis geneem en hom van moord aangekla.
Hy sal na verwagting Maandag in die Seshego-landdroshof verskyn.
Die vrou is in ‘n ernstige toestand by ‘n plaaslike hospitaal opgeneem.
– Volg Nuus24 op Twitter
- SAPA