Man vermis ná boot by Hermanus omslaan
2010-11-25 17:00
Johannesburg – ‘n Twee-en-twintigjarige man word vermis nadat die boot waarop hy besig was om vis te vang Woensdagaand omgeslaan het, het die Nasionale Seereddingsinstituut (NSRI) Donderdag gesê.
“Vrywilligers van NSRI in Hermanus is om 06:20 ingelig dat twee mans vermis is ná ‘n nag se visvang op die Botrivier-strandmeer,” het Henk Henn, NSRI Hermanus se stasiebevelvoerder gesê
‘n Soektog is geloods na ‘n 54-jarige man en sy 22-jarige seun, wat laas gesien is waar hulle ‘n 3,5 meter lange boot uitgevat het om die aand te gaan visvang, het hy gesê.
Toe hulle teen 06:00 nog nie teruggekeer het nie, het familielede hulp ontbied.
Die boot, wat omgeslaan het, is Donderdagoggend deur reddingswerkers gevind en kort daarna het hulle die pa op die strand gevind.
Hy is vir skok behandel en na ‘n hospitaal geneem.
Die soektog na die vermiste seun duur nog voort.
“Volgens die oorlewende is hulle Woensdagaand omstreeks 23:30 deur ‘n brander omgeslaan. Hulle het oliepakke en rubberstewels aangehad en nie reddingsbaadjies gedra nie, so dit het hul pogings om te bly dryf bemoeilik.
Die pa het glo aan die boot se romp vasgeklou, terwyl die seun aan ‘n drywende petroltenk vasgehou het.
“Dit blyk of die 22-jarige êrens deur die nag verdwyn het.
“Die pa het gesê dat hy op een punt weggedraai het van sy seun, maar toe hy weer kyk, het sy seun verdwyn.”
Die pa het dit gevolglik reggekry om tot op die strand te swem.
Volg Nuus24 op Twitter
- SAPA