Man verkoop glo vervalste doktersbriewe

2011-01-13 16:11

Johannesburg – ‘n Zimbabwiese man is in hegtenis geneem nadat hy glo vervalste doktersbriewe aan mense in Ivory Park verkoop het, het die polisie in Johannesburg Donderdag bekend gemaak.

“Die polisie, tesame met ‘n dokter en ‘n ooggetuie, is Woensdag na die perseel waar die man die doktersbriewe vanaf verkoop het,” het ao. Neldah Hlase, polisiewoordvoerder, gesê.

 Die doktersbriewe is glo teen sowat R70 verkoop en is selfs gestempel met ‘n dokter se naam daarop.

Die 24-jarige verdagte het sy “besigheid” glo in 2007 begin nadat hy ‘n soortgelyke vervalste doktersbrief gesien het.

Na bewering het die polisie ook beslaggelê op rekenaars, ‘n drukker en ‘n fotostaatmasjien.

Die verdagte sal binnekort in Tembisa in die landdroshof verskyn.

Volg Nuus24 op Twitter.
 

- SAPA