Man verdrink toe hy tas uit rivier haal
2010-07-01 09:47
Volksblad
Kroonstad – Yskoue water en die “misleidende” diepte van die Valsrivier met sy kolke het ’n Kroonstadse man waarskynlik oorweldig toe hy met dapperheid in die water gespring het om ’n kleretas uit te haal.
“Ek het die een oomblik nog sy kop bo die water gesien en die volgende was hy weg,” het ’n erg verslae Jaco du Plessis (22) Woensdag op die oewer aan Volksblad gesê.
Andries Vermaak (41) het Dinsdagaand voor Du Plessis se oë in dié rivier, wat deur Kroonstad loop, verdrink.
“Andries het nie gespook of gespartel nie. Hy het net verdwyn.”
Du Plessis het aanvanklik gedink Vermaak, wat die afgelope drie maande by hom geloseer het, maak ’n grap.
Toe Vermaak egter ná ’n ruk steeds onder die water was, het Du Plessis onraad vermoed en die polisie ontbied.
Kapt. Msisitheki Selima, woordvoerder van die Kroonstadse polisie, sê die voorval het omstreeks 21:00 gebeur.
Die polisie se duikeenheid in Welkom het Vermaak se lyk én die kleretas Woensdagoggend uit die water gehaal. Du Plessis het verslae langs die oewer gestaan en kyk hoe die duikers na die lyk soek.
Du Plessis en ander familielede het sy broer, Kobus (26), Dinsdagaand op die treinstasie in die middedorp gaan haal. Vermaak was saam.
Hulle het van die treinstasie oor die Alexanderbrug (die “robotbrug” soos dit in inwonersmond bekend staan) na Du Plessis se huis in die woongebied Suidrand gestap.
Vermaak het Kobus du Plessis se vrou, Louise, se kleretas gedra. In ’n stadium het die tas glo oor die brugreling in die rivier geval, sê Selima.
Vermaak het toe na die oewer gehardloop en in die water gespring.
Du Plessis (Jaco) sê Vermaak het “ingegaan, ’n ent geswem en toe net afgegaan”.
Vermaak, wat glo van Warmbad is, het die afgelope drie maande by Du Plessis geloseer. Hy het by ’n insleepdiens op die dorp gewerk.
Volgens ’n jare lange inwoner het die Valsrivier sy naam gekry omdat die rivierbodem op sekere plekke baie ongelyk is. Voorts is daar glo ook kolke. Dít mislei mense (is “vals”) en het al tot vele verdrinkings gelei.
- Volg Nuus24 op Twitter.
- Volksblad