Man verdrink naby Gordonsbaai

2013-01-29 08:13

Kaapstad – Die polisie se duikeenheid is op soek na die lyk van 'n 30-jarige man wat naby Gordonsbaai in die Wes-Kaap verdrink het, het die Nasionale Seereddingsinstituut (NSRI) gesê.

Edward Roussow van die NSRI het gesê hulle is om 13:40 Maandagmiddag na die toneel tussen Bikinistrand en die Steenbrasmond ontbied.

Die man se kollegas het volgens Roussow aan reddingswerkers gesê hy is van 'n rots afgespoel en het onmiddellik onder die water verdwyn.

Sy kollegas het 'n tou in sy rigting gegooi om hom te probeer red, maar hulle was onsuksesvol.

"Ten spyte van 'n uitgebreide soektog, is daar geen teken van die vermiste man nie."

Die polisie het 'n geregtelike doodsondersoek geopen. Die man se naam is nie bekend gemaak nie.
      
– Volg Nuus24 op Twitter

- SAPA