Man vas wat oom doodsteek

2013-01-07 14:07

Johannesburg – 'n 26-jarige man is in hegtenis geneem ná hy na bewering Maandag sy oom doodgesteek het ná die twee in Katlehong in 'n rusie betrokke was, het die Gautengse polisie gesê.

Die polisie het die 40-jarige man dood op die toneel aangetref, het kapt. Mega Ndobe gesê.

"Daar word beweer dat die man 'n rusie met sy suster se seun gehad het, waartydens die seun 'n mes te voorskyn gebring het en sy oom in sy bolyf gesteek het, waarna hy op die vlug geslaan het," het Ndobe gesê.

Die verdagte is 'n kort afstand van die toneel af aangekeer. Die mes wat na bewering in die moord gebruik is, is in 'n kartondoos versteek gevind.

Hy sal eersdaags in die hof verskyn.

– Volg Nuus24 op Twitter.

- SAPA