Man se onwettige vuurwapen in dak gevind

2012-07-25 14:13

Johannesburg – ‘n Veertigjarige man is in Katlehong op die Oos-Rand in hegtenis geneem vir die besit van ‘n ongelisensieerde vuurwapen, het die Ekurhuleni-metropolisie Woensdag gesê.

Volgens insp. Kobeli Mokheseng is die man Dinsdagaand in hegtenis geneem nadat ‘n 9 mm-pistool met agt koeëls en ‘n spaar magasyn in die dak van sy slaapkamer in Khumalo Vallei gevind is.

Die reeksnommer op die vuurwapen was afgefeil. Die man beweer hy het die vuurwapen opgetel.

Die wapen is oor die naweek in die lug afgevuur en gemeenskapslede het die metropolisie van die voorval ingelig.

“Beamptes het na sy huis gegaan en hy het ontken dat hy ‘n vuurwapen besit. Hulle het die huis deursoek en het die pistool in die dak van sy kamer gevind,” het Mokheseng gesê.

– Volg Nuus24 op Twitter

 

- SAPA