Man vas wat meisie se huis brandsteek

2013-02-06 17:27

Johannesburg – ‘n Man is in hegtenis geneem nadat hy glo ‘n deel van sy meisie se huis in Kagiso aan die Wes-Rand aan die brand gesteek het, het die polisie Woensdag gesê.

Die 48-jarige man het die vrou beskuldig dat sy ‘n verhouding met iemand anders gehad het toe ‘n argument Dinsdag uitgebreek het. Sy het hom weggejaag, het ao. Solomon Sibiya gesê.

“Die verdagte het in die badkamer weggekruip en homself toegesluit sonder dat sy meisie daarvan geweet het,” het Sibiya gesê.

Hy sê die man het later uitgekom en die vrou se kamer aan die brand gesteek, waarna hy gevlug het. Sy het buite die huis gesien hoe rook uit haar kamer trek en het die brandweer en polisie gekontak.

Die man het gevlug, maar is later in hegtenis geneem.

Sibiya sê die skade beloop sowat R5 000.

Die man sal binnekort in die Kagiso-landdroshof verskyn op ‘n aanklag van brandstigting.

– Volg Nuus24 op Twitter


 

- SAPA