Man vas wat glo 13-jarige verkrag

2013-01-02 17:56

Johannesburg – 'n Man wat na bewering 'n 13-jarige meisie verkrag het, is in Dyushu in Butterworth in hegtenis geneem, het die Oos-Kaapse polisie Woensdag gesê.

"Die tiener was verlede Donderdagmiddag op pad na 'n winkelsentrum langs die Ndabakazi-stasie toe sy die man na bewering raakgeloop het," het kapt. Jackson Manatha gesê.

Die man wou die tiener 'n R2-muntstuk gee, maar sy het geweier om dit te neem. Hy het haar toe aangeval, haar na 'n veld gesleep en verkrag. Hy het die tiener gedreig en gesê sy mag niemand van die voorval vertel nie.

Manatha het gesê dis nie duidelik hoe gemeenskapslede van die beweerde verkragting te hore gekom het nie, maar hulle het hom Dinsdag by sy huis daaroor gekonfronteer.

"Hulle het die polisie gebel, wat hom dadelik in hegtenis geneem het," het hy gesê.

'n Saak van verkragting is teen die 59-jarige man aanhangig gemaak en hy sal Donderdag in die Butterworth-landdroshof verskyn.

– Volg Nuus24 op Twitter.

- SAPA