Man vas ná verkragting van bejaarde
2013-02-26 08:44
Durban – 'n Man wat na bewering 'n bejaarde vrou verkrag het, is in die KwaDindi-gebied van Taylor's Halt, buite Pietermaritzburg, in hegtenis geneem, het die Witness Dinsdag berig.
Die 23-jarige man is Sondag in samewerking met die inwoners van KwaDindi aangekeer.
Die 91-jarige is verlede Sondag in KwaDindi in die Vulindlela-gebied verkrag.
Joey Jeevan, polisiewoordvoerder, het gesê die vrou was omstreeks 21:00 op die punt om bed toe te gaan in haar enkelvertrek-huis toe sy 'n klop aan haar deur gehoor het. Iemand het kort daarna aan 'n venster geklop, maar sy het die geklop geïgnoreer.
'n Man met 'n mes het kort daarna deur 'n venster in haar kamer geklim, het Jeevan aan die Witness gesê.
Die man het haar verskeie kere verkrag, tot in die vroeë oggendure van Maandag. Hy het haar toe gedreig en kontant geëis.
"Sy het R250 wat sy onder haar kussing gehad het, oorhandig, en hy het van die toneel gevlug," het Jeevan gesê.
Die verdagte is aangekla van verkragting, huisbraak en diefstal.
– Volg Nuus24 op Twitter.
- SAPA
