Man vas ná gyseldrama in Grahamstad
2012-09-10 18:26
Grahamstad – ‘n Man is in hegtenis geneem na hy ses jong meisies gyselaar gehou het in Grahamstad, het die polisie gesê.
Die ses meisies was in ‘n huis in Uitbreiding 9 toe die man omstreeks 04:00 daar aangekom het, het kapt Mali Govender gesê.
Die eienaar van die huis, ‘n polisiebeampte van Grahamstad, was nie in daardie stadium tuis nie.
Die man het die polisiebeampte gebel ná hy haar vuurwapen in die huis gekry het, het Govender gesê.
Hy het die beampte gekontak en gesê dat hy die meisies gyselaar hou. Een van die meisies was die beampte se dogter.
Die polisie is van die situasie in kennis gestel.
“Voor die polisie daar aangekom het, is verskeie skote in die lug afgevuur ná ‘n buurman met die verdagte probeer praat het,” het Govender gesê.
Die polisie se onderhandelaars het by die huis aangedoen, en die man het hom teen 08:00 oorgegee. Hy is dadelik in hegtenis geneem.
Sake van poging tot moord, ontvoering en die onwettige afvuur van ‘n vuurwapen is teen hom geopen.
“Die voorval is glo gekoppel aan ‘n klagte wat die vorige aand ontvang is,” het Govender gesê.
“Die verdagte het die polisie die vorige aand vir bystand gevra om na die beampte se huis te gaan om sleutels van sy huis daar af te haal. Daar was glo ‘n huishoudelike geskil. Die verdagte se sleutels is toe aan hom oorhandig.”
Govender het bygevoeg dat die polisie ‘n interne ondersoek ook van stapel sal stuur.
Niemand is tydens die voorval beseer nie.
Die man sal na verwagting eersdaags in die Grahamstad-landdroshof verskyn.
– Volg Nuus24 op Twitter
- SAPA
