Man van Bloem steeds vermis
2011-10-07 08:11
Bloemfontein – Die familie van ’n vermiste Bloemfonteiner het hom al vergeefs by hospitale en lykshuise gaan soek.
Isak “Sakkie” Jacobus Nienaber (52), oorspronklik van Harrismith, is Dinsdag omstreeks 23:30 die laaste keer by die kuierplek Die Dekke in Curielaan, Bloemfontein, gesien.
“My enigste gebed is om hom te kry. Die onsekerheid maak ons mal,” sê sy dogter Annette Botha.
Haar pa het volgens ooggetuies, toe hy klaar by die Die Dekke gekuier het, in sy swart Volkswagen Citi Golf (2008) met registrasienommer DMJ757FS geklim en weggery.
Botha sê hy was vermoedelik op pad huis toe, maar het nooit daar aangekom nie.
Hy het die motor vroeër in ’n kompetisie van die Spar-winkelgroep gewen.
Nienaber het sowat drie maande gelede van Harrismith na die stad verhuis nadat hy by Free State Transformers in Bloemfontein werk gekry het. Botha sê hy was nagenoeg ’n jaar lank werkloos.
Nienaber bly by sy dogter en haar gesin in Fauna.
Sy het Woensdagoggend wakker geword en gesien die ligte, wat sy vir haar pa aangelos het, brand nog en sy bed is steeds netjies opgemaak.
Sy dogter en haar gesin sou Woensdag met vakansie na Durban vertrek, maar bly nou tuis om na Nienaber te soek. Sy ander dogter, Renette Nienaber, sou saam met ’n vriendin na die Aardklop-kunstefees gegaan het, maar het ook gebly.
Sy familie is al met foto’s van hom na hospitale en lykshuise, maar sonder enige sukses. Hy is as vermis by die polisie aangemeld en pamflette waarop sy gesig is, is na polisiekantore in die Vrystaat gefaks.
Teen druktyd Donderdagaand was Nienaber steeds soek.
“Ek wil net weet waar hy is en of hy oukei is,” sê Botha.
Sy sê haar pa het ’n wonderlike sin vir humor en hou daarvan om met mense te gesels. “Hy is lief daarvoor om karre op te bou en is goed met sy hande.”
Enigiemand wat Botha en haar suster kan help om hul pa op te spoor, kan hulle by 083-669-5089 of 073-295-0930 bel.
Volg Nuus24 op Twitter.
- Volksblad