Man tronk toe ná hy hom aan studente ontbloot

2012-12-08 11:36

Johannesburg – 'n Gewoonte-ontbloter van Pretoria is ná sy derde hofverskyning vir dié oortreding tot 18 maande tronkstraf gevonnis, het Beeld berig.

Die 40-jarige Timothy Mclaughlin is Vrydag in die Hatfield-landdroshof skuldig bevind op aanklag van openbare onsedelikheid. Hy is in hegtenis geneem nadat hy homself op 22 Mei en 6 Junie aan studente van die Universiteit van Pretoria ontbloot het.

Mclaughlin is op 23 Januarie en 5 Junie skuldig bevind aan dieselfde oortreding en onder korrektiewe toesig geplaas.

Op 22 Mei het Mclaughlin heeltemal kaal onder ’n boom gestaan en hom bevredig terwyl ’n vrouestudent verbygedraf het.

In die voorval van 6 Junie het Mclaughlin op ’n heuwel op die Joolplaas gaan staan, sy gulp oopgetrek en hom bevredig terwyl ’n ander vrouestudent dit moes aanskou.

Landdros JC Kruger et gesê die feit dat Mclaughlin op 5 Junie in Lydenburg aan openbare onsedelikheid skuldig bevind is en hom net die volgende dag weer aan so ’n oortreding skuldig gemaak het, dui op arrogansie.

Dr. Charles Blom, ’n psigiater, het getuig Mclaughlin het ’n chemiese wanbalans in sy brein wat die obsessiewe – en kompulsiewe – drange veroorsaak om hom voor vroue te ontbloot.
     
– Volg Nuus24 op Twitter

- SAPA