Man sterf toe hy twee agtervolg ná inbraak
2010-08-24 08:35
Pretoria - ’n Lid van die plaaslike gemeenskapspolisiëringsforum (GPF) is Maandagoggend tydens ’n skietery met inbrekers by Rietfontein aan die Wes-Rand doodgeskiet.
Een van die misdadigers is gewond en is onder polisiebewaking in die hospitaal.
Volgens kapt. Appel Ernst, polisiewoordvoerder, het Theo de Jager (43) omstreeks 10:00 gesien hoe twee mans ’n huis op ’n kleinhoewe verlaat.
Toe hy ondersoek gaan instel, het hy agtergekom daar was ’n huisbraak.
“Hy het die verdagtes agtervolg en ’n skietery het uitgebreek. Hy is in die kop getref en het later in ’n kliniek aan sy wond beswyk,” het Ernst gesê.
Die vermeende rower is in die been gewond en na ’n plaaslike hospitaal geneem.
Volgens Jorncy Page, voorsitter van die Muldersdrift-GPF, is De Jager se dood ’n tragiese verlies vir die GPF en die gemeenskap.
“Hy was altyd ’n aktiewe lid van die gemeenskap behalwe vir die laaste paar jaar.
Hy het hard gewerk om die gemeenskap te beveilig en sy dood is ’n verlies vir almal.
“Wanneer gaan die regering die probleem van misdaad ernstig opneem?
Wanneer gaan hulle begin werk skep vir mense, want dit help nie jy sluit almal toe nie.
Skep werk en mense sal nie ander maniere kry om te oorleef nie.”
Die polisie ondersoek ’n saak van moord.
- Beeld