Man sterf ná rusie oor selfoon
2010-02-08 00:17
Johannesburg - 'n 16-jarige seun het glo 'n 20-jarige man doodgesteek tydens 'n rusie oor 'n selfoon in KaBokweni naby Witrivier, Mpumalanga.
Supt. Malcolm Mokomene, 'n polisiewoordvoerder, het Sondag gesê die voorval het omstreeks 02:00 Sondagoggend plaasgevind.
Hy het gesê die 16-jarige en die 20-jarige was in 'n stryery oor 'n selfoon betrokke waarna 'n vuisgeveg uitgebreek het.
"Die tiener het 'n mes uitgepluk en die oorledene een keer in die bors gesteek. Die tiener het te voet van die toneel gevlug, maar 'n verbyganger het die polisie ontbied," het Mokomene gesê.
Die tiener is twee uur later in hegtenis geneem.
– Sapa