Man sterf ná betoging in Kaapstad
2012-08-14 09:30
Kaapstad – ‘n Man is dood en ‘n vragmotor is aan die brand gesteek in gewelddadige betogings in Khayelitsha, Kaapstad, is Dinsdag berig.
Die Cape Times berig dat die man Maandag naby ‘n vragmotor gevind is. Hy was nog lewend.
“Ons weet nie of hy deur die vragmotor raakgery is en of hy aangeval is nie. Hy is kort daarna dood,” het ao. November Filander aan die koerant gesê.
Sowat 350 inwoners van die BM-seksie het Maandag die strate ingevaar om te betoog oor huise en sanitasie, wat veroorsaak het dat 'n deel van die N2 gesluit is.
Hulle het polisiebeamptes en motors, insluitend vyf Golden Arrow busse, met klippe bestook. ‘n Busbestuurder is beseer.
Volgens die berig is 10 mense in hegtenis geneem en hulle sal Dinsdag in die Khayelitsha-landdroshof verskyn.
Morris Sifo, ‘n gemeenskapsleier, het aan die koerant gesê inwoners woon al sedert 1987 in haglike omstandighede.
“Dit is nie regverdig dat ons in hierdie omstandighede moet woon terwyl ander dele van die gebied gereeld opgegradeer word nie,” het hy gesê.
– Volg Nuus24 op Twitter
- SAPA
