Man sterf in skietgeveg in Pretoria

2012-11-22 15:45

Johannesburg – 'n Man is dood en twee ander gewond in 'n skietgeveg met die polisie in Akasia, Pretoria, Donderdagmiddag, het die polisie in Gauteng gesê.

Drie mans in 'n silwerkleurige Mercedes Benz het losgebrand op polisiebeamptes wat hulle agternagesit het, het lt.kol. Katlego Mogale gesê.

"Die polisie het teruggevuur en een van die mans in die motor is doodgeskiet en die ander twee gewond. Een van die mans wat gewond is, is onder polisiebewaking in die hospitaal. Die tweede een is op die toneel behandel en in hegtenis geneem."

Die drie mans was glo Dinsdagaand betrokke by 'n huisroof in Laudium. Die oortreders het in 'n silwerkleurige Mercedes Benz gevlug.

"Die moontlikheid dat die verdagtes by ander inbrake in die Laudium-gebied betrek word, word nie uitgesluit nie," het Mogale gesê.

Die twee sal binnekort op aanklagte van poging tot moord, huisroof en die besit van ongelisensieerde vuurwapens in die hof verskyn.
     
– Volg Nuus24 op Twitter

- SAPA