Man sterf in ongeluk op N2 ná twee resies jaag
2010-12-09 09:15
Die Burger
Kaapstad - Die bestuurder van ’n Citi Golf is in hegtenis geneem ná ’n ongeluk gister in die vroeë oggendure tussen drie voertuie waarin ’n jong man op slag dood is.
Dié ongeluk het omstreeks 03:15 op die N2 op Hospitaaldraai plaasgevind.
Volgens reddingsdienste het die Golf en ’n VW Polo vermoedelik resies gejaag. Die voertuie was in die rigting van die stad op pad toe die silwer Polo van agter in ’n Chana-bakkie vasgery het.
“Die Chana-bakkie het gerol en’n 20-jarige insittende is uit die bakkie geslinger. Hy is op die toneel oorlede. Dit is onseker of hy die bakkie bestuur het.
Die oorledene is mnr. Faseeq Anthony van Lansdowne.
“Die wrak, met ’n passasier in, het in die stadige baan (binnebaan) van die N2 tot stilstand gekom,” het me. Keri Davis, woordvoerder van die metro-nooddiens, gesê.
Die twee motors het met die impak van die botsing gebots en in die vinnige baan teen die betonmuur vasgejaag.
Vyf mans, onder wie die oorledene se jonger broer wat ook in die bakkie was, is in die ongeluk beseer en na die Groote Schuur-hospitaal gebring.
Sers. Hilton Malila, woordvoerder van die Woostock-polisie het gesê twee insittendes van die Polo, onderskeidelik 23 en 26, is in hegtenis geneem en sal môre in die Kaapstad-landdroshof op aanklagte van strafbare mansslag verskyn.
Verkeer in die rigting van die stad is ure lank vertraag omdat die N2 gesluit moes word vir die forensiese ondersoek en opruimingswerk.
Talle motoriste was laat vir werk weens die verkeersontwrigting.
Die provinsiale minister van vervoer, Robin Carlisle, het in ’n verklaring gesê hy hoop die twee bestuurders word swaar gestraf “sodat dit as boodskap kan dien dat jaagduiwels in die tronk en nie op ons paaie hoort nie.”
Volg Nuus24 op Twitter.
- Die Burger