Man sterf in mislukte kaping buite Benoni

2012-11-05 13:42

Johannesburg – ‘n Vermeende gewapende rower is die naweek in ‘n skietery in Kemptonpark, buite Benoni, doodgeskiet, het die polisie gesê.

Kapt. Jethro Mtshali sê die polisie het Sondagoggend omstreeks 03:00 twee mans betrap toe hulle ‘n motoris se bakkie en ander besittings probeer steel het.

Die polisie het vroeër met die bestuurder gepraat toe sy bakkie langs die pad opgemerk is.

“Hy het gesê hy het sonder petrol gaan staan. Hulle het hul hulp aangebied en na ‘n vulstasie gegaan om petrol vir hom te kry,” het die polisiewoordvoerder gesê.

Toe die polisiebeamptes teruggekeer het, het hulle die aanvallers op heterdaad betrap.

“Die rowers het op die polisie geskiet en die polisievoertuig beskadig. Hulle het probeer weghardloop, maar een van hulle is in die gesig geskiet en het op die toneel gesterf,” het die woordvoerder verduidelik.

Mtshali sê die polisie is nog op soek na die ander verdagte.

Volg Nuus24 op Twitter  

- SAPA