Man sterf in kop-aan-kop botsing
2011-12-18 10:06
Johannesburg – 'n Man (41) is dood en vyf ander beseer nadat twee motors naby Mahikeng in 'n kop-aan-kop botsing betrokke was, het die departement van gemeenskapsveiligheid in die Noordwes Sondag gesê.
Volgens Lesiba Moses Kgwele, woordvoerder, het die ongeluk Saterdag gebeur nadat 'n Ford Ikon met 'n BMW op die N18 tussen Mahikeng en Vryburg gebots het.
"Daar word beweer dat die Ford Ikon, met vyf insittendes, na Setlagole gereis het toe dit teen die BMW gebots het wat in die teenoorgestelde rigting gery het.
Die 41-jarige man was 'n passasier in die Ford Ikon en het in die voorste sitplek gesit.
Hy is op die toneel dood verklaar terwyl die bestuurder van die BMW, wat alleen in sy motor was, in 'n kritieke toestand na die Victoria privaathospitaal in Mahikeng gehaas is.
"Die 35-jarige bestuurder van die Ford Ikon, 'n 10-jarige seun en jongmense in hul twintigs, is na die provinsiale hospitaal in Mahikeng geneem met ernstige beserings.
"Daar word vermoed dat spoed en die bestuur onder die invloed van alkohol dalk die oorsaak van die ongeluk is," het Kgwele gesê.
– Volg Nuus24 op Twitter.
- SAPA