Man sterf in Rustenburg-ongeluk
2011-08-26 17:36
Johannesburg – ‘n Man het gesterf toe sy bakkie trompop teen ‘n vragmotor op die R26 buite Rustenburg gebots het, het die departement van openbare veiligheid in die Noordwes Vrydag gesê.
Lesiba Moses Kgwele, ‘n woordvoerder vir die departement, sê die ongeluk het Donderdagaand omstreeks 21:00 gebeur.
Kgwele sê ‘n Toyota Hilux-bakkie wat van Kroondal na Rustenburg gereis het, het uitgeswaai en in die aankomende verkeer beland.
Volgens hom het die bakkie daarna teen ‘n Volvo-vragmotor gebots. Die vragmotor het van Rustenburg na Pretoria gery.
Die vragmotor het geknipmes, aan die brand geslaan en heeltemal uitgebrand.
Kgwele sê die 38-jarige bestuurder van die bakkie is op die ongelukstoneel dood. Die vragmotorbestuurder het ligte beserings opgedoen.
Volg Nuus24 op Twitter.
- SAPA