Man steeds vermis na haai-aanval
2010-01-13 08:28
Johannesburg – Die soektog na ‘n man wat Dinsdagmiddag in Vishoek deur ‘n haai aangeval is duur steeds voort, het die polisie in die Wes-Kaap gesê.
“Die Nasionale Seereddingsinstituut (NSRI) het Woensdagoggend omstreeks 05:15 hulle soektog voortgesit met die hulp van polisieduikers vanaf Simonstad. Verskeie lewensredders het ook uitgehelp. Op hierdie stadium is niks nog gevind nie,” het insp. November Filander, polisiewoordvoerder, gesê.
Die vermiste persoon, wie se naam nog nie bekendgemaak is nie, is oorspronklik van Zimbabwe en is glo Dinsdagmiddag in die vlakwaters deur ‘n haai gegryp.
Vier reddingsbote en ‘n helikopter is dadelik ingespan om die man op te spoor. Die soektog moes egter teen sononder gestaak word.
Die nuus van die aanval kom etlike ure nadat die stad Kaapstad se rampbestuur ‘n waarskuwing uitgestuur het om swemmers teen haaie te waarsku.
“Die haaie kom veral hierdie tyd van die jaar langs die Kaapse kus voor,” het Wilfred Solomons-Johannes, woordvoerder van stad Kaapstad se rampbestuur, gesê.
– Sapa