Man slaap in sel oor TV-reeks se gewere
2010-01-07 07:59
Nurene Jassiem
Kaapstad - Gewere wat in die gewilde TV-reeks Arende gebruik is, het ’n man gisteraand in die polisieselle laat beland.
Bob de Haan, ’n jare lange vriend van die bekende rolprentmaker en TV-regisseur Dirk de Villiers, is gisteraand by die V&A Waterfront in Kaapstad in hegtenis geneem vir die onwettige besit van ammunisie.
De Villiers sr. (85) is op 28 Desember in die Chris Barnard-gedenkhospitaal in die Moederstad oorlede nadat hy ’n hartaanval gehad het.
Volgens die akteur Gys de Villiers, ’n seun van De Villiers sr., het De Haan ná sy pa se roudiens Saterdag in Stellenbosch die rolprentmaker se kantoor in Kaapstad gaan ontruim.
“Hy het tussen die goed in die kantoor op ’n boks vol gewere afgekom wat in die TV-reeks Arende gebruik is.
“Hy was op pad om die goed by die naaste polisiekantoor te gaan aflaai toe hy genooi is om by die Waterfront te gaan eet,” het De Villiers gisteraand verduidelik.
Op pad na die Waterfront moes De Haan by ’n padblokkade stop, waar hy vir ’n vale moes verduidelik.
Die polisie het hom in hegtenis geneem en op die gewere en patrone beslag gelê.
Kapt. F.C. van Wyk, ’n provinsiale polisiewoordvoerder, het bevestig dat 200 patrone en skerp ammunisie in De Haan se besit gevind is.
“As gevolg van die ernstigheid van die klag sal die man die nag in die polisieselle moet deurbring.
“Die landdros sal môreoggend (vanoggend) besluit of hy vrygelaat kan word of nie,” het Van Wyk gesê.
Van Wyk het mense gewaarsku as hulle van oorledenes se vuurwapens of ammunisie ontslae wil raak, moet hulle dit eerder in die teenwoordigheid van ’n polisiebeampte doen.
Só sal soortgelyke voorvalle verhoed word, het hy gesê.
De Villiers sr. se werk sluit in flieks soos Kalahari Harry en Kaalgat tussen die Daisies.
- Die Burger