Man slaan verpleegster by hospitaal
2011-07-28 21:48
Johannesburg – ‘n Verpleegster is glo deur ‘n man wie se ma vroeg Donderdagoggend by die Chris Hani Baragwanath-hospitaal dood is geslaan, het die Gautengse departement van gesondheid gesê.
Die verpleegster het familielede in ‘n kamer ingeroep om hulle in te lig oor die dood van hul ma, toe die vrou se seun die verpleegster geslaan en haar vir sy ma se dood blameer het, het woordvoerder Simon Zwane in ‘n verklaring gesê.
Ntombi Mekgwe, die Gautengse LUR vir gesondheid, het die aanval veroordeel en gesê dit sal nie geduld word nie.
“Hierdie voorval het vrees onder die werknemers by die hospitaal veroorsaak. Gesondheidspersoneel moet deur die samelewing beskerm word, aangesien hulle waardevol is in die lewering van kwaliteit gesondheidsorg,” het sy in die verklaring gesê.
Die hospitaal het ‘n saak by die polisie geopen.
Die verpleegster ontvang sielkundige ondersteuning.
– Volg Nuus24 op Twitter
- SAPA