Man skuldig wat buurtwag-lid vermoor
2013-01-14 17:23
Pretoria – ‘n Man van Pretoria is Maandag deur die hooggeregshof van Pretoria daaraan skuldig bevind dat hy ‘n lid van 'n buurtwag vermoor en ‘n ander beseer het.
Mandla Ntuli (30) is skuldig bevind aan agt aanklagte insluitend moord, poging tot moord, aanranding, roof met verswarende omstandighede en die onwettige besit van ‘n vuurwapen.
Die saak hou verband met ‘n rooftog in Centurion drie jaar gelede.
Regter Winston Msimeko het Ntuli se bewerings dat hy onskuldig is, en deur die polisie gemartel is en gedwing is om ‘n skuldbekentenis te teken, verwerp.
Andre Erlank, ‘n lid van die buurtwag in Mnandi, het oorleef nadat hy in die bors geskiet is terwyl hy hulp op sy tweerigting-radio probeer ontbied het.
Hy het opgemerk dat daar ‘n rooftog by die Mnandi Spar in Centurion is.
Die rowers het Erlank se vriend en mede-buurtwaglid, Louis Viljoen (39), in sy motor doodgeskiet terwyl hy van die toneel probeer vlug het.
Erlank en sy seun, Andre jnr., het op 2 Februarie 2009 by die winkel stilgehou.
Sy seun het die winkel binnegegaan toe ‘n groep rowers dit binnegestorm en begin skiet het, het die hof gehoor.
Erlank het getuig hoe een van die rowers hom in die oë gekyk en hom sonder ‘n woord geskiet het.
Nadat hy uit sy motor gekruip het, het twee van die rowers hom op die grond neergedruk en sy selfoon en geld gesoek.
Sy seun het getuig dat een van die rowers teruggekeer het nadat hy sy selfoon gesteel het en hom met ‘n pistool oor die kop geslaan het.
Msimeki het beslis dat Ntuli se bekentenis as getuienis toelaatbaar was.
Ntuli het in die verklaring gesê dat hy deel was van ‘n groep van 14 mans wat die rooftog beplan en uitgevoer het. Hy het bevestig dat hulle almal gewapen was.
Sy twee mede-beskuldigdes, Mzokhona Sipho Nene en Sbusiso Sfiso Sibiya, is steeds op vrye voet.
Msimeki het die bewyse van een van die kassiere aanvaar wat Ntuli geïdentifiseer het as die rower wat ‘n pistool teen sy kop gehou, sy selfoon geneem het en hom beveel het om vir hulle die kantoor te wys.
Die aanklaer, Corne Pruis, het aangevoer dat Ntuli tot lewenslange tronkstraf gevonnis moet word.
Surita Joubert het vir die verdediging aangevoer dat Ntuli ‘n kleiner straf moet kry aangesien hy reeds byna vier jaar in die tronk deurgebring het.
Hy was ‘n eerste oortreder en het vier jong kinders om te ondersteun.
Ntuli sal Woensdag gevonnis word.
– Volg Nuus24 op Twitter
- SAPA
