Man skuldig oor lyk van vermoorde seun
2010-09-01 08:09
Bloemfontein – ’n Jong man van Bloemfontein is in die Vrystaatse hooggeregshof aan begunstiging tot moord skuldig bevind omdat hy gehelp het om een van die lyke van twee vermoorde kinders buite die stad in die veld te versteek.
Lebohang Mokethi en sy medebeskuldigde, Diamond Moahli (31), is deur regter M.B. Molemela onskuldig bevind op aanklagte dat hulle Sefadi Petrus Nqai (14) en Paseke Pule (4) op 2 Februarie 2008 vermoor het.
Omdat Mokethi Pana Nqai gehelp het om die oudste seun se lyk weg te dra van sy ouerhuis af, is hy aan begunstiging tot moord skuldig bevind.
Nqai (20) van Dennelaan, Bainsvlei, moet twee vonnisse van 20 jaar elk vir die moorde op die twee kinders só samelopend uitdien dat hy effektief 25 jaar tronkstraf moet uitdien.
Sy verhoor is vroeër van dié van die ander twee geskei nadat hy skuld op die aanklagte beken het.
Mokethi en Nqai het by die twee vermoordes se gesin in Dennelaan gewoon toe die ouers hul kinders op 2 Februarie onder die twee se sorg gelaat het.
Toe die ouers van die stad op die hoewe terugkom, was daar niemand tuis nie. Die kinders het spoorloos verdwyn.
Twee jaar later is die erg ontbinde lyk van ’n jong seun in die veld gevind.
Vroeg in 2009 is die lyk van Paseke Pule in ’n puttoilet gevind nadat Moahli inligting oor die vermiste kinders verskaf het en Mokethi en Nqai uitwysings aan die polisie gedoen het. Die oorsaak van dood is as ’n kopbesering weens stompgeweld in ’n lykskouingsverslag aangegee.
Dawie Reyneke tree vir Mokethi op en Peter van der Merwe het vir Moahli opgetree. Adv. Johan Roothman kla aan. Die verhoor is tot 20 September vir vonnis uitgestel.
Volg Nuus24 op Twitter.
- Volksblad