Man skuldig aan moord by braai
2011-10-11 07:04
Bloemfontein – ’n Man wat ’n ander man in ’n bakleiery op ’n vleisbraaiery in Bloemfontein geslaan het dat hy op die warm kole beland het en daarna weer geslaan het, is Maandag in die Vrystaatse hooggeregshof aan moord skuldig bevind.
Callie van Niekerk (26) van Janse van Rensburgstraat, Wilgehof, is ook aan poging tot moord skuldig bevind nadat hy sy meisie by wie hy ’n kind het nege maande daarna só geslaan het dat sy bykans vier weke in die intesiewesorgeenheid van ’n hospitaal moes deurbring.
Hy het Maandag voor regter Corné van Zyl skuld op albei aanklagte beken en gesit en ruk soos hy snik terwyl sy regsverteenwoordiger, Dillon Bruintjies, sy skriftelike pleitverduideliking in die hof uitgelees het.
Daarin vertel hy hoe hy en sy meisie, Adele Erasmus (22), die dag van 25 Augustus 2009 by Peter van Greunen (35) se huis in Janse van Rensburgstraat 313 gekuier het.
Hulle het gedrink en gesels toe Van Greunen in ’n stadium aggressief raak en hom beskuldig het dat hy met hom voor die vroue spot.
Van Greunen het hulle van sy huis af weggejaag, maar hulle kon nie uitkom nie omdat die hek met ’n afstandbeheer oopgemaak moet word.
’n Bakleiery met vuiste, elmboog en koppe het tussen hom en Van Greunen ontstaan. Van Greunen het later ’n piksteel gebruik, maar mis geslaan.
“Ek gryp toe die piksteel, ek het hom begin aanrand met gebalde vuiste, elmboë en my knieë. Hy het toe plat geval in die braaivleisvuur en het daar gelê in die warm kole.
“Ek en Adele het hom later vanuit die warm kole gesleep. Ek het hom toe weer met gebalde vuiste in sy gesig geslaan terwyl hy plat op die grond gelê het.”
Van Greunen is die volgende dag aan veelvuldige beserings dood.
Oor die poging tot moord sê hy dat hy en Erasmus op 29 Mei verlede jaar van ’n familielid se troue af in Altonastraat, Fichardtpark, op pad was en gedrink het. Hy het dagga gerook. Hy wou kokaïen gaan rook, maar sy wou dit nie toelaat nie en eerder in ’n nagklub verder gaan drink. Hy het vir haar weggehardloop, maar sy het hom ingehardloop en begin vloek en beledig.
Sy het gesê as hy dwelms gaan rook, gaan sy by ander mans slaap en dan sal hy sy kind nooit weer sien nie.
“Ek het toe my humeur verloor en haar toe begin slaan met die oop hand en ek het haar geskop en getrap. Ek kan nie onthou hoeveel houe het ek haar geslaan nie. Sy het geskreeu en gehuil en is ek toe later gestop deur lede van die publiek,” sê hy in sy pleitverduideliking.
Hy was op borgtog op die moordaanklag uit toe hy sy meisie probeer vermoor het.
Adv. Sophie Giorgi tree vir die staat op. Die vonnisverrigtinge begin vandag.
Volg Nuus24 op Twitter
- Volksblad