Man skuld R42 000 vir parkering by OR Tambo

2013-01-07 11:35

Johannesburg – ‘n Sakeman skuld die OR Tambo- internasionale lughawe sowat R42 000 nadat hy sy motor meer as 12 maande lank daar geparkeer het, het The Star berig.

Desmond Grootboom, wat in Johannesburg en Kaapstad woon, het sy blou Renault Clio op 8 November 2011 in die parkeerterrein gelos en die motorsleutels en parkeerkaartjie vir ‘n vriend gegee.

Die vriend het egter die kaartjie verloor en nie die sakeman daarvan in kennis gestel nie.

Die motor het toe 14 maande lank in die lughawe se parkeerarea gestaan.

The Star berig Grootboom skuld die lughawemaatskappy R42 700, wat gebaseer is op die huidige prys van R100 vir die eerste 24 uur en R50 vir elke 12 uur daarna.

Hierdie bedrag is hoër as die boekwaarde van die motor, wat tussen R20 000 en R40 000 werd is.

Die motorlisensie het ook verval, waarna ‘n boete van R500 op die voertuig se ruit geplaas is.

Volg Nuus24 op Twitter  

- SAPA