Man skiet 'per ongeluk' swanger vrou
2011-04-14 09:45
Durban – ’n Pa van drie kinders is gearresteer nadat hy sy swanger vrou glo Woensdag per ongeluk by hul huis in Hilton, noordwes van Pietermaritzburg, doodgeskiet het.
Volgens die polisie het die 35-jarige man vir hulle gesê hy het in die vroeë oggendure ’n geluid buite sy slaapkamer gehoor en homself bewapen voordat hy gaan ondersoek instel het.
Hy het geskiet en sy vrou, wat uit die badkamer gekom het, getref. Die 34-jarige vrou is in die Medi-Clinic in Pietermaritzburg dood.
Die voorval het omstreeks 01:30 in hul huis in Weirrylaan, Hilton Gardens, gebeur.
Die man se jonger suster het gesê haar broer het hulle omstreeks 03:45 gebel en gesê hy het ’n “verskriklike fout gemaak”.
“Hy het haar na die Medi-Clinic geneem. Toe ons by die hospitaal kom, het ons hom ’n toestand van skok langs sy vrou gekry en hy het nie gepraat nie.
“Die polisie was al daar en het hom na sy huis in Hilton geneem voordat hulle hom na die Hilton-polisiekantoor geneem het, waar ek hom laas gesien het,” het die suster gesê.
Die egpaar, wat sowat 13 jaar getroud is, het drie kinders tussen 5 en 12 jaar.
Die man se ma het gesê die egpaar het nie gewerk nie. “Hy het by sy pa se boumaatskappy begin werk, toe het sy pa vir hom ’n plaas in Albert Falls en dié huis gekoop. Toe sy pa in 2005 dood is, het die seun die plaas verkoop.”
Hy het die geld belê wat hy uit die verkoop van die plaas gemaak het en ’n bestaan uit die opbrengs van die beleggings gemaak, het die ma gesê.
Die huis was leeg toe Beeld Woensda daar was. Die hoofhek is met polisielint afgesper en twee honde het van agter die hek geblaf.
Ao. Joey Jeevan, polisiewoordvoerder, het gesê die man verskyn na verwagting spoedig in die landdroshof in Pietermaritzburg.
Volg Nuus24 op Twitter
- Beeld