Man skiet sy vrou, homself buite hof
2010-08-04 19:54
Johannesburg – ‘n Man het sy vrou doodgeskiet voordat hy die vuurwapen op homself gerig het buite die Giyani-landdroshof in Limpopo, het die polisie Woensdag gesê.
“Die paartjie het Dinsdag om 16:00 pas by die hof uitgestap toe die vrou na ‘n publieke telefoon naby die hof geloop het om ‘n oproep te maak,” het ao. Thomas Makhubela gesê.
“Die man het sy 39-jarige vrou agtervolg en, sonder om ‘n woord te sê, sy gelisensieerde geweer op haar gerig en haar in die kop en bors geskiet.”
Hy het homself daarna in die kop geskiet. Beide is op die toneel dood.
Volgens Makhubela was die twee in die hof oor ‘n rusie weens kinderonderhoud.
Makhubela is nie seker wat presies tot die skietery gelei het nie. Die resultate van hul verskyning in die hof is ook nie in dié stadium bekend nie.
Volg Nuus24 op Twitter.