Man skiet op polisie by Kaapse hospitaal
2010-07-17 20:11
Johannesburg – ‘n Man het na bewering Saterdag skote op polisiebeamptes afgevuur buite ‘n hospitaal in Atlantis, het ‘n woordvoerder in die Wes-Kaap gesê.
Volgens kapt. Cyril Dicks, polisiewoordvoerder, het die beamptes ‘n 22-jarige man na die Wesfleur-hospitaal vervoer nadat hy tydens ‘n rooftog in die been gewond is.
“Met hulle aankoms by die hospitaal het die slagoffer sy aanvaller buite die gebou opgemerk en die polisie in kennis gestel,” het Dicks gesê.
Na bewering het die verdagte op die vlug geslaan en die polisie en sekuriteitsbeamptes het hom agternagesit.
Die 26-jarige verdagte het op die polisie begin skiet. Die polisie het teruggeskiet en die man in sy maag gewond. Hy het op die grond neergeval.
Die vuurwapen wat in die verdagte se besit gevind is, is glo vroeër in ‘n ander skietvoorval in Edinburgh Place gebruik.
Volg Nuus24 op Twitter.
- SAPA