Man skiet glo vrou, kind, toe homself
2009-09-11 22:47
Kwalanga, Wes-Kaap - Die liggame van ’n man, vrou en vierjarige kind is Vrydag in ’n huis in Kwalanga gevind.
Die man, in sy laat dertigs, het vermoedelik sy vriendin, die dogtertjie en daarna homself geskiet.
Volgens Insp. Odwa Makupula van die Suid-Afrikaanse Polisie het bure die man deur ’n venster met ’n pistool in sy hand op die vloer aangetref.
Die vrou en kind se liggame is ook in die huis aangetref. Hul lyke was onderskeidelik met ’n laken en ’n kussing bedek gewees.
Die polisie vermoed die man, in sy laat dertigs, het sy vriendin van dertig en die kind geskiet.
Daarna het hy vermoedelik die pistool op homself gebruik.
Die liggame is rondom 11:00 deur die paartjie se bure gevind, het insp. Odwa Makupula van die Suid-Afrikaanse Polisie gesê.
Bure het rondom 05:00 Vrydagoggend skote gehoor, maar niemand was seker waar hulle vandaan kom nie.
Die rede vir die skietery was nie bekend nie.
Die name van die oorledenes kan nie bekendgemaak word voor hul naasbestaandes nie van hul dood in kennis gestel word nie.
- Sapa