Man skiet eks, vriend, stiefseun, homself
2010-07-28 15:04
Johannesburg – Drie mense is tydens ‘n skietery dood nadat ‘n argument tussen 'n man en sy eks-vrou in Springs uitgebreek het, sê polisie.
Kapt. Johannes Ramphora sê ‘n man het sy eks-vrou (40), sy vriend en homself doodgeskiet en ook sy 20-jarige stiefseun gewond.
Die man het glo saam met ‘n vriend na sy eks-vrou se huis gegaan. Hy het die motor se toeter in die oprit geblaas en die vrou het met haar baba in haar arms buitentoe gekom.
“Die twee het glo begin argumenteer toe die man skielik ‘n geweer uitruk en sy vriend skiet. Die vrou het na binne gehardloop en hy het haar agterna gesit,” het Ramphora gesê.
Die man het glo toe sy vrou geskiet en sy stiefseun gewond voor hy die wapen op homself gerig het.
Die drie maande oue baba is ongedeerd.
Die name van die oorledenes is nog nie bekend gemaak nie omdat hul families nog in kennis gestel moet word.
Volg Nuus24 op Twitter.