Man se motor glo deur vriende gesteel
2009-12-23 10:22
Johannesburg - Twee mans is in hegtenis geneem ná hulle vermoedelik 'n vriend se motor gesteel het.
Een van die vermeende diewe, 'n man van Kameroen, het saam met die motoreienaar gewoon.
Volgens insp. Xoli Mbele van die Suid-Afrikaanse Polisiediens het die twee mans hulle vriend se motorsleutels Sondag gesteel en sy voertuig gevat.
Die Kameroener het dieselfde dag wat die motor verdwyn het, by die tweede verdagte ingetrek.
Toe die eienaar van die motor 'n klag van motordiefstal by 'n nabygeleë polisiestasie gaan lê, het hy in sy voormalige huismaat en hul vriend by die polisiestasie vasgeloop.
Die twee mans het ook 'n klag van motordiefstal gelê, maar het later eienaarskap van die motor wat hulle beweer het gesteel was, ontken.
Die mans is in hegtenis geneem en sal op 'n aanklag van motordiefstal in die Johannesburgse landdroshof verskyn.
- Sapa