Man oor oudkollega se dood gevonnis
2011-02-10 08:33
Kroonstad - ’n Polisieman van Parys wat nalatig was met sy vuurwapen en ’n kollega per ongeluk in hul werkvoertuig doodgeskiet het, is Woensdag in die Kroonstadse streekhof weens moord tot 12 jaar tronkstraf gevonnis waarvan vier jaar voorwaardelik vir vyf jaar opgeskort is.
Jonas Mokhahla (in sy vroeë dertigs) se roekelose optrede regverdig direkte tronkstraf, het streeklanddros Rudi Smit tydens vonnisoplegging gesê.
Die hof het gehoor polisielede word voorgeskryf om nooit vir die grap ’n vuurwapen op ’n mens te rig nie.
Mokhahla, nog ’n groentjie in die mag, het op 23 Mei 2009 op so ’n onveilige wyse sy onveilige vuurwapen op Selwin Seisa (29) gerig en die sneller getrek.
Die vuurwapen is nooit beveilig nie nadat dit kort tevore skietgereed gemaak is toe polisielede na ’n gewapende rooftog ontbied is.
Uiters netjies geklee in ’n grys broek, grys hemp en swart en grys oortrektrui het Mokhahla met sykop geboë na die vonnis gestaan en luister.
Hy het die wapen van die Suid-Afrikaanse Polisiediens vasgesteek aan sy trui gedra.
Streeklanddros Smit het beklemtoon hoewel Mokhahla nie vir Seisa met opset doodgeskiet het nie, kon hy voorsien het dat só iets kon gebeur.
“Die gemeenskap sien op na polisiebeamptes om vuurwapens verantwoordelik te hanteer... dit is ongelukkig so dat dit baie voorkom dat polisielede op ’n onverantwoordelike wyse met vuurwapens optree, met noodlottige gevolge,” het streeklanddros Smit gesê.
Mokhahla is op dié oggend ná nagskof by die polisievoertuig gespot oor die sitplek wat hy met grondboontjiedoppies bemors het.
Hy het dit as ’n grap beskou en in dié luim die vuurwapen op Seisa gerig en die sneller getrek.
Toe hy besef ’n koeël is afgevuur en Seisa is gewond, het hy Seisa se naam uitgeroep.
Volgens streeklanddros Smit was Mokhahla nie net geskok nie, maar ook “heeltemal verbouereerd”.
Hy het van meet af aan tydens die verhoor erken hy is verantwoordelik vir Seisa se dood, maar dat dit nie met opset was nie.
Volgens Gideon Mandelstam, Mokhahla se prokureur, was hy tot Woensdag nog in die polisiediens.
Hy is reeds in ’n dissiplinêre verhoor skuldig bevind en is ’n opgeskorte vonnis opgelê.
Mokhahla is op versoek van Johann Wiegand, vir die staat, onbevoeg verklaar om ’n vuurwapen te besit.
- Volksblad