Man ontbloot hom by laerskool in Pta
2012-02-15 07:03
Pretoria – ’n Middeljarige man het hom Dinsdag voor ’n laerskoolmeisie in Pretoria ontbloot en toe in sy bakkie gespring en weggejaag.
Johannes Holtzhausen, hoof van Laerskool Rachel de Beer, het gesê die man het net ná 11:00 in ’n wit Toyota-bakkie by die skool stilgehou.
Die man het die meisie in die leerlinge se pouse na die heining by die rugbyveld geroep.
Toe sy nader stap, het die man uit die bakkie geklim en die swart hemp wat hy aangehad het, opgelig en sy naakte lyf aan haar gewys.
Sy het gegil en weggehardloop.
Die leerling se ma het haar ná die voorval by die skool kom haal.
“Mense wat hulle so voor kinders ontbloot, is siek.
“Kinders moet probeer kalm bly in sulke situasies en die registrasienommer van die voertuig neerskryf of onthou sodat die verantwoordelikes aangekeer kan word.
“Kinders moet verkieslik nie alleen loop nie en altyd waaksaam wees,” het Holtzhausen gesê.
Marius Freysen, voorsitter van die Pretoria-Noord-gemeenskapspolisiëringsforum (GPF), het gesê hulle is bewus van die voorval en GPF-lede is op die uitkyk vir die man.
Volgens Freysen was daar verlede week twee soortgelyke voorvalle by skole in Hercules, in die weste van Pretoria.
Inligting oor die voorvalle kan by dié GPF se noodnommer, 079 572 8236, verskaf word.
– Volg Nuus24 op Twitter
- Beeld
