Man ná botsing deur tientalle bye gesteek
2011-10-30 13:31
Kaapstad – ‘n Sekuriteitswag is in ‘n kritieke toestand nadat hy beheer oor sy motor verloor het op Belladona Plant en in ‘n boom vas gebots het, het ER24 Sondag gesê.
Die impak het veroorsaak dat ‘n byekorf in die bom losgekom het en honderde bye het uitgevlieg.
Die man, wat in sy laat twintigs of vroeë dertigs is, is deur die bye gesteek terwyl hy nog in sy motor vasgekeer was.
Hy het gevolglik uit sy voertuig geklim en na ‘n nabygeleë rivier gehardloop. Hy het in die water gaan lê met sy gesig na onder om van die bye te probeer ontsnap.
Met nooddienswerkers van ER24 se aankoms op die toneel, het hulle hulself met klere en ‘n kombers toegedraai om hulself te probeer beskerm teen die bye.
Teen die tyd wat hulle die man bereik het was daar steeds bye wat besig was om hom te steek.
Hy is na ‘n ambulans gedra en daar is gevind dat hy verskriklik baie bysteke opgedoen het.
Hy is in ‘n kritieke toestand na die Nelspruit Mediclinic geneem.
Dit wil voorkom asof die sekuriteitswag beheer oor sy motor verloor het om ‘n draai. Die pad was nat as gevolg van reën die vorige aand.
– Volg Nuus24 op Twitter