Man mors drankie op Zuma; beland in sel
2010-08-10 08:20
Volksblad
Durban - ’n Man wat ’n drankie by die Durban July-perdewedren op pres. Jacob Zuma gemors het toe die staatshoof verbygestap het, het ’n nag in die polisieselle deurgebring en staan nou op ’n aanklag van aanranding tereg.
Roy Moodley, eienaar van die wenperd Bold Silvano, het gesê hy het gesien wat gebeur het en reken nie daar was enige kwade bedoelings nie.
“Niemand het seergekry nie. Ek het nie gesien dat iets solied of ’n glas gegooi word nie. Ek dink dit was net water,” het Moodley aan Volksblad se susterkoerant The Witness gesê oor die voorval voorverlede Saterdag by Durban se Greyville-renbaan.
Volgens hom het Zuma nie eens dadelik besef dat iets op hom gemors is nie.
Volgens ’n ingeligte in die polisie is die drankie gegooi net toe Zuma verbygeloop het. “Ons weet nie of dit met opset gedoen is nie,” het die ingeligte gesê.
Brig. Phindile Radebe, polisiewoordvoerder, het bevestig dat die man na die Berea-polisiekantoor gebring is waar ’n aanrandingsklag ingedien is.
Die man is die Sondag op borgtog van R500 deur die polisie vrygelaat voordat hy die volgende dag in die Durbanse landdroshof verskyn het.
Die polisie ondersoek nog die saak, het Radebe gesê.
Daar kon nie Maandag vasgestel word wie die aanrandingklag ingedien het nie.
Daryl Peense, die man wat luidens The Witness in hegtenis geneem is, het Maandag gesê hy het “geen kommentaar oor hierdie aangeleentheid nie”.
’n Kaapstadse student, Chumane Maxwele, het ’n skadevergoedingseis ingestel ná ’n opsienbarende voorval in Februarie vanjaar waarby lyfwagte van Zuma betrokke was. Hulle het Maxwele in hegtenis geneem toe hy die middelvinger vir die presidensiële konvooi gewys het toe dit verby hom gery het terwyl hy gedraf het.
Nathi Mthethwa, minister van polisie, het gesê die strafregtelike saak teen Maxwele is laat vaar nadat die student ná sy inhegtenisneming skriftelik om verskoning gevra het.
- Volksblad