Man moet jammer sê oor wegsteek-kamera
2009-12-09 09:48
Sonja Carstens
Johannesburg - ’n Alleenloper wat tien vroue en ’n meisietjie met ’n versteekte kamera in sy badkamer afgeneem het, moet as deel van sy vonnis ’n verskoning in plaaslike koerante publiseer waarin hy sy berou uitspreek.
Graham Large (42), ’n meubelhandelaar van Vaalwater, is gister in die landdroshof in Modimolle tot twee jaar tronkstraf gevonnis, opgeskort vir vyf jaar.
Daarbenewens sal hy vir 36 maande onder korrektiewe toesig wees en is sy rekenaar, ’n DVD-speler, twee kameras en CD’s met die opnames van sy slagoffers verbeurd verklaar aan die staat.
Large het gister skuld beken op tien aanklagte van crimen injuria en twee aanklagte van die besit van kinderpornografie nadat hy ’n pleitooreenkoms met die staat bereik het.
Luidens die ooreenkoms het Large bykans ’n jaar lank ’n versteekte kamera in sy badkamer só geposisioneer dat dit die vroue afgeneem het terwyl hulle sy toilet gebruik of gestort het.
Onder dié slagoffers was ’n meisietjie wat tussen die ouderdom van vier en ses jaar was.
’n Tweede versteekte kamera is ingespan om die vroue af te neem wanneer hulle op ’n stoel sou sit om sy rekenaar te gebruik. Al die vroue was onbewus van die kameras.
Luidens die ooreenkoms het Large sedertdien by die St. Johns Kerk in Vaalwater aangesluit en ontvang hy berading. Hy is ’n eerste oortreder en het tot bekering gekom.
Die slagoffers, onder wie ’n boesemvriendin van Large, was baie geskok oor sy optrede en voel verneder.
- Beeld