Man moet hof toe wat drankie 'mors'
2011-01-27 09:34
Durban - Die Albertonse man wat van aanranding aangekla word nadat ’n drankie glo op pres. Jacob Zuma gemors is, sal oor twee maande verhoor word nadat sy aansoek om die geskil buite die hof te skik van die hand gewys is.
A. Gyaparsad, Daryl Peense (31) se prokureur, het vertoë tot adv. Simphiwe Mlotshwa, KwaZulu-Natal se direkteur van openbare vervolging, gerig dat die saak vir alternatiewe geskilbeslegting verwys word.
Alternatiewe geskilbeslegting is deel van herstellende geregtigheid.
Herstellende geregtigheid behels onder meer dat die betrokke partye byeen kom, dat die oortreder tot die besef gebring word wat die impak van sy optrede was en dat ooreengekom word hoe die saak reggestel kan word.
Thami Ntuli, staatsaanklaer, het Woensdag tydens Peense se verskyning in die Durbanse landdroshof ’n brief van die provinsiale vervolgingsgesag by die hof ingedien waarin die versoek vir alternatiewe geskilbeslegting van die hand gewys word.
Volgens Natasha Ramkisson, woordvoerder van die vervolgingsgesag, was Mlotshwa van mening dat dit beter sal wees as die saak op deursigtige wyse in ’n ope hof aangehoor word, aangesien Zuma ’n openbare figuur is.
Die aanklag teen Peense spruit uit ’n voorval op verlede jaar se July-perdewedren waartydens ’n drankie glo op Zuma gemors is toe die staatshoof verbygeloop het.
Peense sal op 22 Maart verhoor word.
Ntuli het aangedui die staat het drie getuies en die verdediging twee.
- Volksblad