Man met eie wapen 'terregestel'
2009-12-07 09:11
Virginia Keppler
Johannesburg - ’n Man van ’n plaas in die Roossenekal-distrik in Mpumalanga is in ’n wraakaanval met sy eie vuurwapen “tereggestel”.
Die aanval op Gawie Hough (42) kom twee maande nadat ’n voormalige plaaswerker van Deon (41), sy broer, hom gedreig het met die woorde: “Ek gaan jou wys wat ek met ’n wit man kan maak.”
Deon Hough, baas van dié plaas op die Steelpoort-pad, sê sy broer is Donderdagaand vermoor.
“Ek is Donderdag omstreeks 16:30 van die plaas af weg. Ons het nog gepraat en gelag. Om 18:00 het ons bure vier skote gehoor. Ons huiswerker, wat saam met my broer tuis was, is eers die Vrydagoggend na die polisie om te sê my broer is vermoor.”
Volgens hom het sy broer se aanvallers hom in die huis oorval en daarna sowat 600 m van die huis af gesleep. Hulle het hom toe in ’n paadjie op ’n baie kort afstand, terwyl hy vermoedelik vir hulle gekyk het, in die linkerkant van sy gesig geskiet.
’n Bron na aan die Hough-familie sê die kruit van die vuurwapen het ná sy dood nog op Gawie Hough se gesig vasgesit.
“Hy het hom vermoedelik in die paadjie doodgebloei, want hy het in ’n plas bloed gelê. Hulle het hom daarna nog sowat 15 m verder in die bosse gesleep, maar het moontlik gestop om te rus voordat hulle hom nog 15 m verder gesleep en hom onder ’n boom gelos het,” het Hough gesê.
Die aanvallers het sy broer vervolgens nog sowat 20 m verder tot langs ’n rivier gesleep en hom daar in die bosse gelos voordat hulle gevlug het.
Hy was net in ’n onderbroek geklee.
Deon Hough het gesê een van sy plaaswerkers het ná die voorval spoorloos verdwyn. Die werker is ’n broer van een van sy voormalige werkers. Albei mans is van Zimbabwe.
Volgens Deon Hough het hy die een broer ’n paar maande gelede afgedank omdat hy moeilikheid veroorsaak het.
“Twee maande gelede het dié werker my gebel en gesê: ‘Ek gaan jou wys wat ek met ’n wit man kan maak.’ Ek het hom gevra wat hy soek en hy het gesê hy wil R600 van my hê.
“Ek het die R600 vir sy broer gegee om vir hom te gaan gee. Ek het ook sy broer gevra om my selfoon waarmee die een broer weg is terug te kry, maar hy het dit nooit gestuur nie.”
Gawie Hough se moordenaars is vort met sy rewolwer, twee radio’s, twee selfone en sowat R1 000.
Die polisie het nooit vingerafdrukke op die toneel gaan neem of sy selfoonnommer geneem om hom te kontak nie, het Deon Hough gister gekla.
Supt. Ronel Otto, ’n polisiewoordvoerder, het bevestig dat die Houghs se huiswerker die polisie ontbied het. Otto sê daar is ’n moontlikheid dat drie verdagtes by die aanval betrokke is.
- Beeld