Man met R20 milj. se diamante betrap

2012-11-14 13:00

Johannesburg – 'n Libanese man is in hegtenis geneem nadat hy probeer het om diamante ter waarde van R20 miljoen uit die OR Tambo lughawe te smokkel, het die Valke Woensdag gesê.

Kapt. Paul Ramaloko, woordvoerder van die Valke, het gesê die 25-jarige man is Dinsdagaand in hegtenis geneem op 'n vliegtuig wat vir Doebai bestem was.

"Ons het beslag gelê op 220 diamante wat hy kort ná sy inhegtenisneming ingesluk het."

Hy sal Donderdag in die Kempton Park-landdroshof verskyn.

In Maart is nóg 'n Libanese man (27) by die lughawe in hegtenis geneem en die polisie het beslag gelê op diamante ter waarde van R15 miljoen.

Ramaloko het gesê die polisie vermoed dat die twee deel is van 'n diamanthandel-sindikaat.

Die ondersoek duur voort.

– Volg Nuus24 op Twitter

- SAPA