Man lewenslank tronk toe oor 'kroonjuwele'
2011-11-11 07:01
Bloemfontein – ’n Man wat ’n ander man se “kroonjuwele” vir R5 000 aan ’n Chinees wou verkoop, is gister in die Vrystaatse hooggeregshof lewenslank tronk toe gestuur nadat hy aan moord skuldig bevind is.
Dit was ’n koelbloedige moord wat Thabang Nosi (21) van Lesotho die aand van 3 Februarie vanjaar langs ’n spruit by Thaba Nchu vir geldelike gewin gepleeg het, het regter Faan Hancke gister gesê voordat hy hom tot lewenslange tronkstraf gevonnis het.
Hy het op ’n grusame en wrede wyse opgetree en op ’n weersinwekkende wyse Joseph Pitso (45) se testikels uitgesny.
Pitso was ’n sagte teiken omdat hy blykbaar beskonke en tenger gebou was, het regter Hancke gesê.
Foto’s van sy lyk langs die spruit by Ratlou, en ook die testikels wat in ’n plastiek-winkelsakkie agter Nosi se kamerdeur gekry is, is by die hof ingedien.
Nosi, wat aanvanklik skuld ontken het, het getuig hy was die vorige dag by ’n Chinees se winkel op Thaba Nchu waar hy werk gesoek het.
Die Chinees het gesê hy moet die volgende dag terugkom.
Die volgende dag het die Chinees gesê hy sal aan hom R5 000 betaal vir ’n man se testikels.
Daardie aand het hy Pitso sien loop en hom gepootjie. Toe Pitso val, het hy hom gewurg en toe sy testikels uitgesny. Hy het ’n sakkie daar sien lê, die testikels daarin gesit en is daarmee huis toe.
Luidens die staatsaak het die polisie inligting uit die gemeenskap gekry en toe op dié vonds afgekom.
Regter Hancke het aan Nosi verlof toegestaan om teen sy vonnis na ’n volbank van die hooggeregshof te appelleer. Hoewel die moord wreed is, is hy jeugdig en ’n eerste oortreder, en kan ’n ander persoon dalk op ’n ander vonnis besluit.
Adv. Sophie Giorgi het aangekla. Adv. Lawrence Tshabalala het vir Nosi opgetree. Advv. Lawrence Manye en Anchen Coetzee het regter Hancke as assessore bygestaan.
’n Aanklag van moord is vroeër in die landdroshof op Thaba Nchu deur die staat teen Wen Chen (31) teruggetrek nadat die polisie nie sy betrokkenheid by dié moord kon bewys nie.
– Volg Nuus24 op Twitter
- Volksblad