Man kry lewenslank vir niggie se verkragting
2011-06-28 16:04
Komatipoort – ‘n Man van Mpumalanga is tot lewenslange tronkstraf gevonnis nadat hy sy niggie verkrag het.
Die 39-jarige man, wie se naam nie bekendgemaak word nie om die kind se identiteit te beskerm, is in die Tonga-streekshof naby Komatipoort gevonnis.
“Die man is in Maart verlede jaar gevonnis nadat hy die kind in hul huis in Masibekela, suid van Komatipoort, verkrag het,” het polisiewoordvoerder sers. Mzwandile Nyambi Maandag gesê.
Hy het die slagoffer se familie gekomplimenteer vir die feit dat hulle nie gehuiwer het om die saak aan te meld nie.
“In meeste gevalle rapporteer familielede nie verkragtings wat deur ander familielede gepleeg word nie en gevolglik bly die slagoffers in traumatiese omstandighede saam met hul verkragters,” het Nyambi gesê.
Die man het glo sy niggie weggeroep van haar vriende buite en het haar beveel om huis toe te gaan en te bad.
“Terwyl sy uitgetrek het, het hy haar na sy kamer geneem en haar verkrag,” het Nyambi gesê.
Die kind het glo vir haar suster vertel, wat gevolglik hul ma vertel het.
“Die ma het die voorval by die polisie aangemeld en ‘n dokter het die verkragting bevestig,” het Nyambi gesê.
Volg Nuus24 op Twitter
- African Eye