Man kry lewenslank ná niggie se moord
2010-02-24 18:10
Pietermaritzburg – ‘n 25-jarige man van Pietermaritzburg wat sy niggie verkrag en vermoor het, is Woensdag tot twee maal lewenslange tronkstraf gevonnis in die stad se hooggeregshof.
Siphiwe Ndlovu van Nchanga het skuldig gepleit op die verkragting en die moord en het beweer dat hy die dade gepleeg het om sy ma te “straf”.
Hy het gesê dat hy kwaad was vir haar omdat sy aan ander mans gesê het dat sy nie omgee as hulle hom aanrand nie, aangesien hy moeilik was.
Hy het in Mei verlede jaar huis toe gegaan om sy ma te berispe oor haar “dislojaliteit” en het probeer om haar aan te rand, maar sy het weggekom en haarself in ‘n kamer toegesluit.
“Ek het voorgeneem om haar seer te maak deur haar kleinkind, wat haar oogappel was, dood te maak,” het hy gesê.
Hy het sy niggie by die skool gaan haal en op pad huis toe het hy gesê dat hy wil sit en rus.
Hy het ‘n ent in die bosse ingegaan en haar gevra om op sy skoot te sit, waarna hy haar verkrag het.
Toe hy klaar is het hy besef sy is in pyn en hy het “sleg gevoel”.
Hy het haar verwurg, haar kop teen ‘n stomp geslaan en veroorsaak dat haar skedel kraak. Hy het haar lyk daar gelos.
“As hy hierdie wrede, hartelose dade teen ‘n lid van sy eie familie kan pleeg, dink net wat kan hy aan ander doen,” het regter Wendy Hughes-Madondo gesê.
Sy het gesê dat hy geen vooruitsigte van rehabilitasie het nie en sy het hom aansoek tot appèl geweier.
- Sapa