Man kry R50 000 vir onwettige inhegtenisname

2012-03-22 15:07

Bloemfontein – Die polisie moet ‘n Wes-Kaapse man R50 000 in skadevergoeding betaal nadat hy onwettig in hegtenis geneem en aangehou is, het die appèlhof Donderdag beslis.

Die hof het ‘n appèlaansoek deur die minister van veiligheid en sekuriteit verwerp teen ‘n beslissing deur die Wes-Kaapse hooggeregshof dat die inhegtenisname en aanhouding van Johannes Swart, wat ‘n polisiebeampte was, onwettig is.

Die appèlhof het geen rede gevind om in te meng met die hooggeregshof se toekenning van R50 000 plus rente in skadevergoeding nie.

Swart is in Mei 2007 deur ‘n konstabel sonder ‘n lasbrief in hegtenis geneem nadat hy vermoed het Swart het dronk bestuur. Hy is by die De Doorns-polisiestasie aangehou.

Die aanklagte teen hom is die volgende dag teruggetrek nadat toetse getoon het sy bloedalkoholvlak ten tyde van die voorval was onder die toelaatbare wettige perk.

Die sleutelaspek in die appèlsaak het gehandel oor of die blote reuk van alkohol genoeg was om die beampte wat Swart in hegtenis geneem het ‘n redelike vermoede te gee dat Swart dronk was.

Swart se motor het in die vroeë oggendure in ‘n sloot op ‘n gevaarlike draai beland.

Toe hy twee polisiebeamptes voorgekeer het om hom te help, is hy in hegtenis geneem.

Die appèlhof het beslis dat die vermoede deur die beampte wat die arrestasie gemaak het, nie regverdig was nie, en gevolglik was die inhegtenisname en aanhouding onwettig.

– Volg Nuus24 op Twitter

 

- SAPA