Man kritiek wat in e-tolstasie vasjaag

2012-06-17 08:43

Johannesburg – 'n Man is kritiek beseer toe hy in die vroeë oggendure op die N1 naby Rivonia-weg met sy motor in 'n e-tolstasie vasgejaag het, het Netcare 911 berig.

Die oorsaak van die ongeluk is steeds nie duidelik nie, en sal deur die polisie ondersoek word.

Dit wil voorkom of die motor die pad verlaat het, die tolstasie se betonversperring getref het en omgeslaan het.

Personeel van Netcare911 het met hulle aankoms op die toneel gevind dat bestuurder steeds in die motor vasgekeer was.

Die paramedici het die man behandel terwyl die brandweer lewenskake en ander hidrouliese toerusting gebruik het om hom uit die voertuig te bevry.

Die man is op die toneel gestabiliseer en na die Charlotte Maxeke Akademiese Hospitaal geneem.

– Volg Nuus24 op Twitter.

- Nuus24