Man in hof oor ‘mortierplan’ vir sportstadions
2011-11-08 08:07
Johannesburg – Een van die “stigters” van die sogenaamde Boere-kommando het glo vuurwapens, waaronder ’n mortier en semi-outomatiese masjiengewere, in sy huis en beeskraal weggesteek “vir die selfverdediging van die blanke bevolking”.
Johannes Jacobus Scheepers (48) van Bapsfontein, oos van Pretoria, wou glo tydens die Wêreldbeker-sokkertoernooi sportstadions met mortiere aanval. Luidens die klagstaat teen hom in die Pretoria-streekhof sou dit eers op swart woonbuurte “getoets” word.
Hy het Maandag op tien aanklagte van onder meer terrorisme, die onwettige besit van vuurwapens en ammunisie, die besit van verbode wapens, traangas, handgranate, ’n mortier en lanseerder en ses tuisgemaakte handgranate verskyn. Die saak is uitgestel.
Scheepers is verlede jaar kort voor die sokkertoernooi gearresteer. Hy is later op borgtog van R25 000 vrygelaat.
Die aanklag van terrorisme spruit daaruit dat Scheepers glo tussen 16 Desember 2009 en
7 April 2010 saamgesweer het om terroriste-aktiwiteite en handelinge van geweld in die republiek te pleeg.
Opleidingskampe van die Boere-kommando, waarvan Scheepers glo ’n bestuurslid was, is gereël en hy het na bewering in samewerking met ander mense outomatiese wapens gemaak en versamel.
“Hulle wou die Republiek van Suid-Afrika onkonstitusioneel terugneem,” lui die klagstaat.
Van die handkarabyne wat gevind is, sou gebruik word om verkeers- en polisiebeamptes wat “inmeng” te skiet.
Lt.kol. Noel Zeeman, ondersoekbeampte, het in ’n verklaring gesê hulle het op 4 April verlede jaar 03:30 op Scheepers se plaas toegesak. Hy het weggehardloop. In die huis is onder meer 27 semi-outomatiese masjiengewere gevind. In ’n bedekte gat in die beeskraal is houers met traangas, handgranate, ligfakkels en ’n mortier gekry.
Pype van verskillende lengtes en groottes is na bewering in Scheepers se werkwinkel gekry.
Die polisie het ook inligting ontvang dat Scheepers ’n woonwa in Middelburg het. Daarin was glo nóg vuurwapens.
Scheepers het homself die middag aan die polisie oorgegee.
“Geen van die vuurwapens (wat die polisie gevind het) is as gesteel aangemeld nie en die eienaars moet nog opgespoor word,” het Zeeman gesê.
Volg Nuus24 op Twitter.
- Beeld