Man in hof ná raadslid verdwyn
2010-01-13 11:11
Johannesburg – ‘n Man wat in hegtenis geneem is na die verdwyning van ‘n Ekurhuleni-raadslid is met kringtelevisiekameras afgeneem waar hy die slagoffer agtervolg.
Die Sowetan het Woensdag berig dat videomateriaal duidelik wys hoe Vusi Twala die raadslid vanaf ‘n bank, waar hy R700 getrek het, agtervolg.
Die beeldmateriaal wys glo ook hoe Twala by die Naledi-winkelsentrum sowat R1000 uit raadslid Godfrey Mbethe se rekening trek. Daar is ook verdere bewyse dat geld by die Eastgate-winkelsentrum uit die rekening onttrek is.
Twala het Dinsdag in die streekhof in Benoni verskyn en staar klagtes van moord, rooftog, ontvoering en bedrog in die gesig.
Dít kom nadat Mbethe in Julie verlede jaar verdwyn het.
Die staat beweer dat Twala en vier ander verdagtes Mbethe glo ontvoer, beroof en toe vermoor het.
Volgens kapt. Frikkie Steyn, ondersoekbeampte, is Twala se saak tot 13 Februarie uitgestel en sal hy in aanhouding bly tot dan.
– Sapa