Man in hof ná Bredasdorp-tiener sterf
2013-02-08 09:53
Kaapstad – 'n Tweede man wat met die verkragting, moord en verminking van 'n Bredasdorpse tiener verbind word, sal Vrydag in die hof verskyn, het die Cape Argus berig.
Die 21-jarige man sal in die Bredasdorp-landdroshof verskyn. 'n 22-jarige man het Dinsdag in dieselfde hof in verband met die misdaad verskyn.
Anene Booysen is Saterdag met ernstige beserings na 'n plaaslike hospitaal geneem nadat sekuriteitswagte by 'n bouterrein op haar afgekom het. Sy is later na die Tygerberg-hospitaal oorgeplaas, waar sy Saterdagaand gesterf het.
Haar tante, Wilma Brooks, het huilend haar beserings aan die koerant beskryf.
"Haar keel was gesny, al haar vingers en albei haar bene is gebreek, 'n gebreekte glasbottel is in haar opgedruk en haar maag is oopgesny. Dit wat veronderstel was om in haar liggaam te wees, het op die toneel gelê waar sy gevind is."
Anene se grootmaakma, Corlia Olivier, het gesê sy het Saterdagoggend uit haar hospitaalbed na haar geroep.
"Vandat ek by die deur ingestap het, kon ek haar hoor skree 'my ma, my ma, help my asseblief'. Dit was sonder dat sy geweet het ek is daar."
– Volg Nuus24 op Twitter
- SAPA
